„Mun taka yfir fjöldann allan af störfum“ Getur gervigreind starfað sem verðbréfamiðlari

Í þessari heimildarritgerð er verið að skoða áhrif gervigreindar á þá starfstétt sem nefnd er verðbréfamiðlarar. Undanfarin ár hefur það sýnt sig að sjálfvirknivæðing í einhverskonar mynd fer sífellt stækkandi á atvinnumarkaðnum og því mikilvægt að skoða hvar þessi þróun er helst að hafa áhrif. Fram til þessa hefur tækniþróun síðustu ára haft einhver áhrif á starf verðbréfamiðlara þar sem þeir hafa meðal annars nýtt sér hana til framdráttar og aukinnar virkni. Hér verður farið yfir hvernig verðbréfamarkaðurinn í heild sinni virkar og hvernig viðskiptum með bréfin er háttað. Gríðarleg uppbygging hefur verið á síðustu árum á verðbréfamarkaðnum og mikið af nýjum fjárfestum að koma inn á markaðinn. Kröfur til verðbréfamiðlara hafa á sama tíma farið vaxandi. Í dag er gervigreind ekki enn orðin það sem hún getur orðið, en nýting hennar hefur þó farið stigvaxandi síðustu árin. Mörg fyrirtæki nota til dæmis nú þegar nokkurskonar ofurtölvur sem reikna út líkur og þess háttar með algorithma. Tilkoma þeirra hefur væntanlega haft einhver áhrif á störf verðbréfamiðlarans eins og ýmissa annarra starfsstétta. Til þess að skoða betur hvort og þá hvernig gervigreind gæti tekið yfir þessa starfstétt var framkvæmd SVÓT greining á verðbréfamiðlara annars vegar og gervigreind sem verðbréfamiðlara hins vegar. Til þess að styðja við niðurstöður greiningarinnar var leitað eftir svörum frá Jónasi Reyni Gunnarssyni sem hefur starfað á fjármálamarkaði í 14 ár. Erfitt er að fullyrða eitthvað um niðurstöðuna þar sem margt á enn eftir að þróa og fullkomna þegar kemur að gervigreind. Til skemmri tíma litið eru þó talsverðar líkur á að gervigreind taki nær alfarið yfir lítil viðskipti, en stærri viðskiptin muni alltaf þurfa aðkomu mannlega þáttarins í einhverri mynd. Vitað er fyrir víst að gervigreind og vélmenni munu hafa gríðarleg áhrif á atvinnumarkaðinn á komandi árum, ekki síst á fjármálaþjónustu. Það verður því fróðlegt og ekki síður mikilvægt að fylgjast vel með þróun þessarar starfstéttar, verðbréfamiðlara í náinni framtíð